Chief Justice of India atan Justice Sanjiv Khanna la lut

Justice Sanjiv Khanna chu Chief Justice of India(CJI) 51-na atan nimin khan rinawmna thu tiam tira lak luh a ni. Pathiannia chawl ta, CJI kal chhuak DY Chandrachud a thlak a ni.

President Droupadi Murmu chuan Rashtrapati Bhavan-ah kum 64 mi, justice Khanna rinawmna thu tiam tirin Chief Justice of India 51-na atan a la lut a ni. Justice Khanna hian thla ruk chhung CJI hna hi a chelh dawn a, nakkum May 13-ah a chawl ve leh ang.

CJI thar lak luh inkhawm hi Vice-President Jagdep Dhankhar, Prime Minister Narendra Modi, Defence Minister Rajnath Singh, CJI kal chhuak DY Chandrachud bakah Supreme Court leh High Court-a judge ṭanglai leh chawl tawh eng emaw zatin an hmanpui a ni.

Justice Khanna hi Delhi-a piang niin, Delhi University-a Campus Law College-a zirchhuak a ni. A pa, justice Dev Raj Khanna hi Delhi High Court judge ṭhin niin a nu Soraj Khanna hi Lady Shri Ram College-ah lecturer a ni ṭhin. Apatea hi justice Hans Raj Khanna niin Supreme Court judge a lo ni tawh bawk a, emergency hun lai khan hriat hlawh tak a ni.

CJI Khanna hi kum 2005 khan Delhi High Court-ah Additional Judge a thawkin 2006-ah dah ngheh a ni a, hemi hnu January 18, 2019 khan Supreme Court judge ah hlankai a ni. Court sang berah hian bench 450 chuangah ṭhu tawhin Jammu and Kashmir-a Article 370 tih tawpna tur ngaihtuahtu zingah khan a lo tel bakah, Electronic Voting Machines a ṭha tawk tih thutlukna siamnaah pawh a lo tel tawh a ni.