Baba Siddique kap hlumtu man a ni

Mumbai Police leh Uttar Pradesh Special Task Force(STF) ṭangkawp chuan Pathianni khan Nationalist Congress Party hruaitu, Baba Siddique thattu Shivkumar leh mi dang pali an man.

Siddique thihna kaihhnawihah hian mi 18 chu man an ni tawh niin Mumbai Police chuan an sawi.

Baba Siddique hi October 12, 2024 khan Mumbai-a Bandra East-a a fapa, MLA Zeeshan Siddique-a offic building kawtah misual pathumin an kap a, Siddique hian a awmah silaimu pahnihin fuhin, Lilavati damdawi-in panpui nghal ni mah se a hliam tuar lo hian a thi zui a ni.

STF leh Mumbai Police-a Crime Branch hian Pathianni khan Shivkumar leh amah vengtu pali te hi Nanpara, Bahraich district-ah manin Shivkumar hi Nepal-ah bikbo a tum niin Additional Director General of Police(Law and Order and STF) UP police Amitabh Yash chuan a tarlang.

Police-te chuan misual pawl hotu, Lawrence Bishnoi-a nau Anmol, Canada-a cheng mek chu he pawikhawihnaa in hnamhnawih rin ni mah se, a finfiahna engmah an neih loh thu an tarlang.

Pawikhawihtu dang mante hi Kashyap, Gyan Prakash Tripathi, Akash Srivastava leh Akhilendra Pratap Singh te niin Shivkumar-a'n Nepal a pan theihna tur atana lo veng tute nia tarlan an ni.

Pawikhawihtu inpuanna aṭangin Siddique chu hun eng emaw chen chhung khan an lo veh ruk tawh thu leh hun remchang an hmuh veleh a chet la nghal an nih thu a sawi.

" Baba Siddique that tura min tih hian Rs nuai 10 chu ka thah hnua min pek min tiam a, chumi hnuah pawh thlatin lawmman pek ka nih tur thu min hrilh bawk. Ralthuam leh SIM card bakah mobile phone te chu tualthahna tur hian min pe a, kan tih turte kan tih hlawhtlin hnu hian SIM card thar leh phone dang chu ka thawhpui te nena kan inbiakna turin min pe leh a ni," tiin Shivkumar hi police hnenah hian a inpuang a ni.