Mongolian Parliament-ah Modi-a'n thu a sawi

Prime Minister Narendra Modi chu China rama nithum a cham hnuin, Mongolia a pan a, nimin khan Mongolian Parliament-ah thu a sawi a, ramdang hruaitu zinga thu sawi hmasa ber a ni. India PM zinga Mongolia ram tlawh hmasa ber a ni bawk.

PM hian Sanghai aṭangin Mon­golia hi a pan a, airport-ah Mongolia Foreign Minister L. Purevsuren-a'n a lo dawngsawng a ni.

Mongolia ram hi China leh Russia inkar ram te tak te a ni a, mihring awm zat pawh maktaduai 2.9 vel chauh an ni. A ram mipui zahve aia tam hi Buddhist sakhaw zuitu an ni a, Islam 3%, Kristian 2.2% leh Shamanist 2.9% an ni. Mihring bit zawng hi kilometre khat bialah mi 1.7 vel awm ang an ni a, khawvela independent ram zingah mihring thawlna ber ram zinga mi a ni.

Mongolia ramah hian kum khatah ni 250 vel chu khua a ṭhain ni a lang a, hei vang hian 'Land of Blue Skies' tia vuah a ni.

India leh Mongolia ramte hian kum tam tak liam ta aṭangin inzawmna ṭha tak an lo nei tawh a, Mongolia rama Buddhism thehdarhtu hi Ashoka leh a zirtirte an ni a, Mughal emperor Babur khan Mongol empire dintu, Genghis Khan-a thlah a ni. Ram pahnihte hian tun hnai kum 60 chhung palai an lo intir tawn tawh bawk.

PM Modi leh Mongolian Prime Minister Chimed Sai­khang­bileg-te chu State Palace-ah inkawmin, hetah hian ram pahnihte thawhdunna turin inremna thuthlung hi ziah a ni. Inremna thuthlung 14 an ziak a, heng zingah hian air service leh cyber security lama thawhdunna tur pawh a tel.

Modi chuan Mongolia rama cancer hospital awmchhun, UlaanBaatar ami tan high-tech machine pahnih a pe a, hengte hi Make in India campaign peng pakhat atana tih a ni. Radiotherapy atana high-tech machine hi khawvelah company 5 chauhin an la siam thei a ni. PM hian UlaanBaatar-ah hian Mongolian University of Science and Technology-a IT Centre lungphum a phum bawk.