Delhi CS ruatah inrem lo

Delhi Chief Minister Arvind Kejriwal leh Delhi Lieu­tenant Governor, Najeeb Jung-te chu Chief Secretary ruat chungchangah an inrem thei lo a, Jung-a'n Acting CS atana a ruat, Shakunta Gamlin chu CM Kejriwal hian a hna zawm lo turin a hrilh.

Delhi Chief Secretary nilai, KK Sharma chu mimal hna avanga US-a a awm avangin, Lt Governor hian additional charge la turin Power Secretary Gamlin-i hi a ruat a, mahse CM Kejriwal chuan Gamlin-i hi power commpany-te tlawn chingah puhin a hna thar hi zawm lo turin a hrilh. Mahse Gamlin-i hian Inrinni khan a hna thar hi a zawm ta tho a ni.

Sorkar laipui chuan Delhi CM thiltih dan hi a dem thu a sawi a, Union Minister of State for Home Affairs Kiren Rijiju chuan Gamlin hi hmarchhak lam mi a ni a, officer ṭha tak a ni bawk tih sawiin, Delhi sorkar thiltih dan chuan hmarchhak mite rilru a ti na hle a ni, a ti. Gamlin-i hi Assam mi a ni.

Rijiju chuan, "Gamlin-i hi dik lo taka thiltiah an puh a, eiruknaaa inhnamhnawih nia an ngai a nih chuan thubuai siamsak mai tur a ni. Chutiang ni loa mipui vantlang hmaa a chungchang chhe taka an sawichhuak hi hmarchhak mite hmusitna a ni," tiin a sawi.

Mahse Chief Minister Kejriwal-a chuan Gamlin-i hian power company duhsak bik a nei tih finfiahna ṭha tak an neih thu a sawi thung a, "Power Secretary a nih angin Power Minister hnenah paper ṭhenkhat sign tur a keng a, mahse minister-in a enchian chuan heng paper-te hi comfort letter niloin guarantee letter a ni zawk tih a hre ta a ni. A zawhchian chuan Secretary hian power company ṭhenkhatin loan, cheng vaibelchhe 11,000 an lakna tur guarantee letter a ni a, hei hi thlawp turin sorkar chu min beisei a ni," a ti. Gamlin-i chuan mi hausa zawkte duhsakin, mipui nawlpuite tana harsatna siamsak a tum a ni, a ti.