Supreme Court-in hma lak loh vangin sorkar laipui a sawisel

Supreme Court chuan kum 2015, December thlaa sorkar laipui hnena sex trafficking kaihhnawiha kaihhruaina mumal duang tura a lo hriattir tawh, tun thlenga hma lakna la awm lo avangin sorkar a sawisel.

Justice P.B Pardiwala kaihhruai Supreme Court bench chuan nimin, Thawhlehni khan Home Ministry hnenah ti tura a lo hriattir tawh chu ngaihthah a ni tih sawiin, tun thlengin 'Organised Crime Investigation Agency' (OCIA) chu din a la ni lo.

Court hian Home Ministry hnenah OCIA hi September 30, 2016 hmaa din tur leh, December 1,2016 hmaa hman theih tura peihfel turin hriattirna a lo pe tawh a ni.

Court hian sex trafficking avanga harsatna thleng leh, a venhim hna thawh te, a tuartute chhanhim chu thil pawimawh tak a nih thu a sawi bawk.

Special law, The Trafficking of Persons(Prevention, Care and Rehabilitation) Bill, 2018 pawh chu tun thlengin pass lohin a la tang mek bawk. He bill hi Lok Sabha ah pass ni tawh mah se, Rajya Sabha-ah a la tlang lo a ni.

Justice Pardiwala chuan Ministry of Women and Child Development secretary kaihhruaina hnuaiah committee din a, sex trafficking thleng ṭhin venna, leh a tuarte a hma leh a hnu lam thlenga ven leh enkawl zui an nih dan tur buatsaih turin a lo hriattir tawh thu a sawi bawk.

He committee member-te chu harsatna tawkte venhim leh thuam chakna tur dan duang a, a hnu thlenga an awmna turte ngaihtuah sak tura tih an ni bawk.