PM Modi-a'n South Korea a tlawh
Prime Minister Narendra Modi chuan China leh Mongolia ramte a tlawh hnuin, nimin khan South Korea a thleng a, Seoul-a president chenna inah guard of honour pek a ni. SKorea-ah hian ni hnih a cham ang.
Seoul a thlen hnu hian Modi hian Seoul National Cemetery-ah pangpar a dah a, hemi hnu hian South Korea President Park Geun-hye nen inbiain, ram pahnihte inlaichinna nghet leh ṭha zawk siam dan turte an sawidun a ni. Tlaiah President Park hian PM Modi lawmna hun hi a buatsaih sak a ni.
Nimin vek khan PM hian South Korean University-ah thu a sawi a, 'Make in India' policy chungchang sawichhuakin, India ram chu khawvela technology ṭha ber ber hmanga thil siamchhuahna hmunpuia siam a duh thute a sawi. South Korea-a India mi awmte pawh India rama investment i turin a sawm nghal bawk.
Vawiin hian khawvela shipbuilder lian ber, Hyundai Heavy Industries a tlawh dawn a, he company hi Ulsan khawpui chhim lama awm niin, company chairperson Choi Kil-Seon a kawm nghal ang. South Korea rama car siamtu lian ber, leh India ram chhim lama plant pahnih nei, Hyundai Motor Company chairperson Chugn Mong-Koo pawh a kawm dawn bawk a ni. Samsung mobile unit hotu, JK Shin pawh meeting a neihpui bawk ang.
Nimin khan SKorea leh India chuan thawhdunna tur inremna thuthlung pasarih an ziak a, inremna an ziahte hi-
Ministry of Shipping leh South Korea Ministry of Ocean and Fisheries-te'n maritime transport lama an thawhdunna tur
Ministry of Road Transport and Highways leh SKorea Ministry of Land, Infrastructure and Transport-te road transport leh highway lama an thawhdunna tur
Ministry of Youth Affairs and Sports leh SKorea Ministry of gender equality and family-te thawhdunna tur
Ministry of Power leh South Korea Ministry of Trade, Industry and Energy-ten eletric power development leh energy industry thar siamna tura an thawhdunna tur
National Security Council Secretariat leh National Security of Republic of Korea thawhdunna tur
Audio-visual co-production lama ram pahnihte thawhdunna tur
Double taxation pumpelhna tur leh, chhiah awlrute venna tura thawhdunna tur thuthlung te an ziak a ni.