Rahul-a'n PM a sawisel

Congress vice presi­dent Rahul Gandhi chuan nimin khan a bial, Ame­thi constituency a tlawh a, Prime Minister Narendro Modi-a'n ram hrang hrang tlawha a zin kual dan a sawisel.

Rahul Gandhi chuan Prime Minister hian khaw­vel ram hrang hrang tlawhin a zinchhuak reng a, hetihlai lai hian ram­chhunga dinhmun harsa tak hmachhawn vanga intihlum, loneitu eng emaw zat an awm a, heng mite tlawh tur hian hun a insiam thei lo a ni, a ti. Ramdang tlawha zinchhuak turin PM chuan dikna a nei a, hemi rual hian harsatna tawktu loneitute ngaih pawimawh hmasak chu a tihtur a ni, a ti.
BJP kaihhruai NDA sorkarin Amethi biala mega food park siam tur a tihtawp leh vangin Rahul Gandhi hian lungawi lohna lantir turin Amethi hi a tlawh a, Modi-a kaihhruai sorkar chu loneitute hun ṭha leh remchang neihte laksakah a puh bawk.
Food park chuan Amethi hmelhmang chu nasa takin a tidanglam dawn a, loneitute pawhin an hlawkpui hle dawn a ni tiin, Rahul Gandhi chuan mahse hei hi NDA chuan a laksak leh ta si a ni, a ti. Food park chu siam a nih theihna turin a bei zel dawn tih a sawi.
Gandhi chuan, "BJP hian ka lakah phuba lak a tum a ni, hei hi kan pawm dawn lo a, kan bei zel ang," a ti. Central-a BJP sorkar chu mi hausa tana thawk leh, mi rethei leh dinhmun chhe zawkte ngaihthahah a puh.