Kum 42 nikhawhreloa awm hnuah Shanbaug-i a thi
Kum 1973, November 27-a hospital sweeper-in a pawngsual ṭuma rawng taka a nghaisak avanga nikhawhreloa awm zui ta, nurse Aruna Shanbuag chu nimin khan Mumbai-a KEM hospital-ah kum 67 mi niin a thi.
Shanbaug-i hi KEM Hospital-ah staff nurse a nih laiin, hospital tifaitu pakhat chuan November 27, 1973 khan pawngsual tumin rawng takin a nghaisa a ni. A nghawngah ui hlinna hruaia rekin che thei loin a dah a, a tukah doctor-te'n an hmuh chuan chain hian a thluaka oxygen luhna tur a lo titawp a, hei vang hian a thluak pawh a tichhia tih an hrechhuak a ni. He vanduaina a tawh aṭang hian a harhchhuak ta lo a ni. Amah khawihtu mipa erawh hi chu kum sarih lung-in a tan hnuah chhuah zalen a ni.
Vanduaina tawktu hi Karnataka lam mi a ni a, mipat hmeichhiat lam hawia rapthlak taka khawih a nih hnu hian a chhungte pawhin an tlawh ngai lo a, KEM Hospital-a nurse-te'n an enkawl a ni. A piancham, June 1 pawh khan doctor leh nurse rualte chuan Shanbaug-i hi an tlawh a, hetihlai hian a chhungte lam erawh tumah an lang lo.
Shanbaug-i hian a bula awmte chu tute nge tih hre lo mah se, mi an awm leh awm loh erawh a hre thei niin amah enkawltute chuan an sawi.
Kum 2011, March thla khan Shanbaug-i chanchin ziaktu, Pinki Virani chuan Supreme Court hnenah petition thehlutin, Shanbaug-i hi a khawngaih avangin thih phalsakna (mercy killing) a dil a, mahse SC chuan a hnawlsak. Hospital management and nursing staff pawhin he petition hi an dodal bawk.