RJD hruaitu hluiin party thar a din

Rashtriya Janata Dal (RJD) hruaitu hlui, Ra­jesh Ranjan, Pappu Yadav tia hriat lar chuan Pathianni khan party thar, Jan Kranti Adhikar Morcha (JKAM) a din.

Chanchin thar la­khawmtute a kawm­naah, Medhepura MP chuan Bihar-in thlan tur dang a neih a ngai a ni, a ti. "Core committee-in kan kal zel dan tur a la rel dawn a, midangte kan thawhpui dawn nge, a malin kan kal dawn tihte an la rel dawn a ni," tiin, kar hnih khat hnuah engkim tihfel a nih tur thu a sawi. Hemi rual hian RJD president Lalu Prasad leh JD(U) hruaitu, Bihar Chief Minister Nitish Kumar-te erawh an thawhpui dawn lo tih a sawi nghal bawk.

Lok Sabha member, Pappu Yadav hi an party kalh zawnga a chet avangin RJD chuan kum ruk atan an party aṭangin a lo hnawtchhuak tawh a ni.

Yadav chuan a party din thar chu RJD leh JD(U) kalphung nen a inang dawn lo tih sawiin, RJD-a ngaihsak hlawh lo party worker tam takin an party thar chu an zawm dawn tih a sawi a, kumina assembly inthlan neih tura chuh an tum thu a sawi bawk.

Tun thla tir lam khan Bihar Minister hlui leh JD(U) hruaitu hlui, Nitish Kumar-a'n CM dinhmun a luahlan leh tak, Jitan Ram Manjhi pawhin party thar, Hindustan Awami Morcha a lo din tawh bawk a, anni pawh hian assembly inthlanah chuh an tum thu an sawi.