Kashmir-ah curfew puan chhunzawm

Kashmir Valley-a tualchhung buaina chhuak vanga curfew leh khuahkhirhna siam chu chhunzawm zel a ni.

Inlakkhran duhtu pawlten security force-te kut tuara civil mite thihna thleng duh lohna lantira nawrh an huaihawt chu August 5 thleng atan an pawtsei a, hei vang hian buaina a chhuah thar leh venthawn thilah thuneitute chuan curfew hi an puang chhunzawm a ni.

Police official-te chuan Kashmir Valley-a Pulwana leh Kulgama district bakah Shopia khuah curfew hi puan chhunzawm a nih thu an sawi a, Valley chhung hmun dangah pawh mipui punkhawm khapna dan hman a ni bawk.

Security force-te chuan dan leh thupek kenkawh hna chu fimkhur takin an thawk mek tih official-te chuan an sawi a, sorkar dodal zawnga che ten tharum thawhna leh vantlang thil an tihchhiat tur ven kawngah chauh tharum an hmang dawn niin an sawi.

Tualchhung buaina thleng avanga thi hi ni nimin thleng khan mi 49 an tling tawh a, midang tam takin hliam an tuar bawk. Prepaid mobile service pawh khuahkhirh zel la niin, phone call dawn theih mah se, midang call ve theih a la ni lo. Postpaid mobile service erawh a pangngaia hman theih a ni thung.

Nimin khan Sringar-ah district 10 tan common entrace test (CET) buatsaih a ni. CET hi state board of professional entrance examinations (BOPEE)-in state chhunga college hrang hranga MBBS zir tumte tana a buatsaih a ni. Chief Minister Mehboob Mufti-i chuan nimin khan Women's College tlawhin, CET neihna tura inbuatsaih dante a enpui a, mahse candidate nu leh pate chuan CM-in a tlawh hi nasa takin an sawisel a, CM kal chuan candidate-te rilru a lapeng nia sawiin an duh loh thu an sawi a, hei vang hian rei pawh awm loin an kalsawn leh nghal a ni.

Buaina siam mipui pungkhawmte hnawhdarhna atana security force-ten silai mu an kahchhuah chuan mi tam tak mitah a fuh a, hei vang hian mit zai ngai pawh eng emaw zat an awm a, ṭhenkhat chu an mit a del hlen phah mai thei nia sawi a ni. State sorkar chuan sorkar laipui hnenah pawh eye specialist tirlut turin a lo ngen tawh a ni.

Sringar hospital-ah hian mit zaina tur hian operation theatre pakhat chauh a awm a, mit zai ngaite zai tura Chennai aṭanga eye specialist pathum kalte chuan kar kalta Thawhlehni aṭang khan an zai ṭan a, mi 48 an zai tawh.