Kejriwal-an Dalit MP-te bang turin a ngen

Delhi Chief Minister leh Aam Aadmi Party (AAP) hotu, Arvind Kejriwal-a chuan tunhnaia ramchhung hmun hrang hranga Dalit hnamte beihna thleng fo chungchangah BJP-a Dalit MP awmte chu an lungawi lohna lantir nana bang vek turin a ngen.

Kejriwal-a chuan BJP-a misual rualten Dalit mite kut an thlak leh an beih fo avangin Dalit BJP MP-te chuan banna an thehlut vek tur a ni, a ti. Hemi hma hian BJP MP Udit Raj chuan thuchhuah siamin, Hindu sakhua humhalhtu intite avangin Hindu sakhua chu a hlauhawm tawh hle a ni a ti. All-India Confederation of SC/ST Organisations chairman ni bawk Udit Raj chuan, "Hindu sakhua vuantute chuan Dalit-ten Kristian Biak-In leh Muslim Mosque an lutte chu an ngaithei lo a, Hindu sakhua chu dinhmun hlauhthawnawm takah a awm niin an sawi. Mahse keini Dalit vang ni loin, anmahni vang zawkin hei hi a thleng a ni" a ti.

Tamil Nadu-ah Dalit mi ṭhenkhat chu Hindu temple-a luh phalsak an nih loh vangin Islam sakhua zawm an tum nia sawi a ni bawk.