Saudi Arabia-a India mite hruai haw dawn

Sorkar laipui chuan Saudi Arabia-a India mi hnathawka kal, an hna chan ta mi tam takte chu thlawhtheihna hmangin a hruai haw dawn.

Saudia Arabia hian sum lama harsatna a tawh avangin hnathawktu tam tak a ban a, hei vang hian hnathawk tura kal, India mi tam tak chuan an hna chanin camp-ah te hrehawm takin an khawsa mek a ni.

Sorkar chuan hna thawh tur neiloa awmte hi India ramah a hruai haw dawn a, hmalak dan enpui tur hian Minister of State for External Affairs Gen (Retired) VK Singh chuan Saudi Araba hi a tlawh dawn a ni a ti.

Khawvel puma oil man tlahniam chu Gulf rama constructon sector hnuaia thawkten an tuar nasa hle a, Saudi Arabia ram hi a tuar nasa ber zinga mi niin factory tam tak khar a ni tawh. Hei vang hian Saudi Arabia-a India mi hnathawk tura kalte chuan an hna an chan a, mi 10,000 vel zet chuan ei tur pawh an nei mumal tawh lo nia sawi a ni. External Affairs Minister Sushma Swaraj-i chuan hemi chungchang hi Inrinni khan a Twitter-ah a tarlang a, Saudi Arabia-a India mi awmte chu an hnampuite harsatna tawh mekah an theih anga pui turin a ngen.

Minister-in a ngen hnu hian Saudi Arabia-a Indian consulate leh India mi awmte chuan ei tur mumal nei loa awm India mite hnenah hian an ei tur an sem a, ei tur hi kg 16,000 zet an sem tawh tih nimin zing khan Swaraj-i chuan a sawi.