Modi-an a thusawi tur atan rawtna siam turin sawm

Prime Minister Narendra Modi chuan nimin khan thla tina radio-a hun a hman ṭhinna, "Mann Ki Baat" programme-ah kumin Independence Day, August 15-a thu a sawi tur chungchangah rawtna siam turin mipuite a sawm.

PM Modi chuan Red Fort-a thu a sawi turah PM duh ang chauh sawichhuah a ni lo tih mipuiten an hriat a duh thu sawiin, mipuite chu sawichhuak tura an duh angte hrilh turin a sawm a ni.

Modi chuan ramchhunga nu naupaite harsatna tawh ṭhin leh, nau chunga thi an awm ṭhin chu a vei thu a sawi a, sorkar hospital leh in enkawlna dangahte naupaite hi a thlawna enkawlna pek an nih tur thu a sawi. Modi chuan ramchhung hmun hrang hranga doctor-te chu sorkarin thla khatah vawi khat a thlawna naupaite enkawlna pe tura ruahmanna a siam chu an bial chhungah kalpui turin a sawm bawk.

Modi chuan mobile phone leh internet kaltlanga dawt thu thehdarh ṭhin a nih chungchangah mipuite chu fimkhur turin a chah bawk. "Mobile phone leh internet kaltlangin mi ṭhenkhat chuan lawmman leh thilpek, scheme hlawk tak anga langte an dawng ṭin a, hengte hi mipuite bumna mai a ni" a ti. Hetiang hmanga tihder hmeichhe pakhat a intihhlum phah thu pawh a sawichhuak a ni. Mipuite chu fimkhur a, hetiang inbumna laka in awh tir lo turin a chah.