Dec 4-ah all party meeting nei dawn

Prime minister Narendra Modi kaihhruai December 4 hian ram chhunga Covid-19 leng mek dinhmun sawihoin all party meeting neih a ni dawn a ni. 

Meeting hi physical-in nge, video-conferencing hmangin neih a nih dawn erawh sawi chian a la ni lo. Defence minister Rajnath Singh, home minister Amit Shah, health minister Harsh Vardhan leh parliamentary affairs minister Prashad Joshi-te pawh an tel dawn nia sawi a ni. 

PM Modi hian November 24 khan chief minister ṭhenkhat chu Covid-19 chungchang avangin meeting a lo neihpui tawh bawk a, hri kai thar an tlakhniam theihna tura hmalak dan tur te, Covid-19 vaccine siam chhuah a nih huna sem a nih dante an lo sawiho tawh a ni. PM chuan state tinte chu vaccine programme buaipui tura district leh block level-a steering committee/task force din vek turin a  hrilh a ni. 

All party meeting-ah hian PM chuan Covid-19 semchhuah dan tura sorkar inbuatsaih dante a sawi rin a ni. 

Modi hian nimin khan video conferencing hmangin vaccine buaipuitu team pathumte chu a kawm a, vaccine chungchang leh a kaihhnawih chungchangte chu mipui nawlpuite hriatthiam theih dan tura an hriattir a pawimawh thute a hrilh. Vaccine sem dan tur chungchanga an ngaihdante a zawt bawk. Nimina PM-in a kawmte hi Gennova Biopharmaceuticals Ltd Pune, Biological E Ltd Hyderabad leh Dr Reddys Laboratories Ltd Hyderabad team-te an ni. PM hian ni 10 chhunga Covid-19 vaccine chungchanga meeting pawimawh a neih ṭum lina a ni. Kar liam ta Inrinni khan vaccine siamna hmun pathum, Ahmedabad, Hyderabad leh Pune-a mite chu tlawhin, an hnathawh leh hmasawn dante a lo enpui tawh bawk. 

India hi khawvela Covid-19 hri kai tamna ram pahnihna niin, US dawtah hri kai hmuh chhuah hi an la tam ber a ni. Mahse hripui vanga thi erawh a kai zat aṭanga chhutin a hniam ber zingah a tel thung.