Manipur jail-ah Saudi Arabian pahnih thah an ni

Manipura-a Imphal East district, Sajiwa Central Jail-ah kar kalta In-rinni khan buaina chhuak-in Saudi Arabian tang pahnih te chuan nunna an chan a, anmahni beitu hi a thi ve zui nghal nia hriat a ni. Pawikhawihna thlen hun hi zing dar khat vel niin an tarlang.

He thil theng chung-changha hian Saudi Arabia chuan thil awmdan hriatchian tumin Manipur sorkar thu a ngaichang tih Union Home Ministry chuan a tarlang. Saudi Arabian thi te hi Sushak Ahmed leh Abdul Salam te an ni a, tualchhung mi Churachandpur district-a cheng Thangmilien Zou chuan a that a ni. Zou hi kum 2010 khan tualthah thubuaiah man a lo ni tawh a ni. Zou hian hriam hrei hmangin a bei a, Jail chhunga hriam hrei hmanga inbeihna thleng hian mak tih a hlawh hle. Inthahna a thlen hnu darkar khat chuang hnuah pawh prison staff leh security te chu an che chhuak lo nia sawi a ni bawk.

Sushak Ahmed leh Abdul Salam te hi kum 2013 khan dan loa ramri an kan hnuah Manipur-ah an lut a, police te chuan Moreh-ah lo manin jail-ah hian dah luh zui an ni. An ruangte hi J.N. Institute of Medical Sciences hospital-ah post mortem tura lak a ni a, India leh Saudi Arabia te chuan ruang lak dan tur chungchangah hian inbiakna an nei mek. Zou ruang erawh a chhungte kutah hlan a ni tawh. He inthahna thleng chungchangah hian Heingang police station-ah thubaui ziah luh nghal a ni a, Sajiwa Central Jail-ah hian tunhma pawhin tharum thawhna a lo thleng fo tawh a ni.

Manipur Home Minister Gaikhangam chuan jail chunga inthahna thleng chu pawi a tih thu sawiin, jail chhungah hian venhimna khauh zawka kalpui tura hma lak a nih tur thu a sawi.