Gandhi-te unauin loneitute tana aw chhuah turin mipui ngen

Congress hruaitu, Rahul Gandhi leh Priyanka Gandhi-te chuan sorkar laipuiin farm law a siam thar duh lohna lantira nawrh huaihawt mek, loneitute thlawpna lantira 'Speak Up for Farmers' campaign chu thlawp turin mipuite an ngen. 

Rahul Gandhi chuan hemi chungchang hi a twitter-ah tarlangin, "Modi-a kaihhruai sorkar chuan loneitute a nghaisa mek a ni. Loneitute tana ṭha lo, dan thar a siam hnuah he dan duh lohna lantirtute chu tharum hmangin a bei let leh bawk. Mahse an theihnghilh chu heng loneitute authawm hi ram pumin a hriatsak a ni," tiin loneitu tihnawmnah tawkte tana auchhuahna, #SpeakUpForFarmers campaign chu zawm turin mipuite a sawm a ni. 

Priyanka Gandhi pawhin farm law thar chuan loneitute hamtṭhatna tur a ngaihthah sak a ni tiin, "Farm law tiin a hming pu mah se a hlawkpui tur hi mi hausa ho vek zawk an ni. Loneitute duh dan leh an thurawn la loin engtinge farmer law hi an siam theih? Sorkar hian loneitute aw hi a ngaihthlaksak phawt tur a ni," a ti. 

Loneitute hian farm law thar duh lohna lantir hian Delhi leh Haryana hmun hrang hrangah nawrh an huaihawt mek. Union home minister Amit Shah-a'n December 3-a inbiak a rawtpuina chu an hnawlsak a ni. 

Nawrh huaihawtnaa tel tur hian Punjab bakah Gujarat leh Maharashtra aṭangin loneitu pawl 32 vel chuan Delhi an pan khawm a ni. An zinga eng emaw zat chuan sorkar laipuiin an awmkhawmna tura a ruahman sak, Burari ground pan duh loin Delhi border area-ah lungawi lohna hi an lantir mek. Singhu border-a loneitute eng emaw zat an la awmkhawm avangin hri a darh venthawn thilah nimin khan medical camp siam a ni bawk. 

Loneitu pawlten an dodal  mek, farm law pathumte chu - The Farmers' Produce Trade and Commerce (Promotion and Facilitation) Act, 2020, The Farmers (Empowerment and Protection) Agreement on Price Assurance and Farm Services Act, 2020, leh The Essential Commodities (Amendment) Act, 2020 te a ni.