Pakistan-ah Rajnath Singh duh lohna lantir

Home Minister Rajnath Singh chu SAARC interior minister meeting hmang turin Pakistan khawpui, Islamabad-ah nimin tlai khan a zin.

Rajnath Singh-a'n Pakistan a tlawh tur hi duh loin, nimin vek khan Islamabad khawpui leh Pakistan-occupied Kashmir-ah pawl hrang hrangten lungawi lohna an lantir. Islamabad-ah chuan Hurriyat Conference worker-ten kawng an dang a, Muzaffarabad Press Club-ah right activist-ten Rajnath Singh chu an rama luh phalsak lo turin Pakistan sorkar an phut bawk.

Kumin January thlaa Pakis≠tan firfiakten Pathankot airbase an beih hnuah Singh hi ram hruaitu pawimawh zinga Pakistan ram tlawh hmasa ber tur a ni.

Pakistan firfiak pawl ṭhenkhat, Jamaat-ud-Dawah leh Hizbul Mujahideen-te chuan Rajnath Sing hi an rama luh phalsak a nih chuan nawrh huaihawt an tum thu an lo sawi tawh bawk. Heng pawlte hian Jammu and Kashmir-a Hizbul commander Burhan Wani thah a nih vanga tual≠chhung buaina nasa tak chhuakah Singh hian mawhphurhna lian tak a nei a ni, an ti.

Burhan Wani thah a nih chungchangah hian Pakistan leh India hruaitute chu ṭawngkamin na tak takin an lo inbei fo tawh a ni. Pakistan Prime Minister Nawaz Sharif-a chuan Wani chu Kashmir hruaitu a ni tiin, India sorkarin a thah tir niin a sawi.

Ni hnih awh tur SAARC meeting-ah hian Rajnath Singh hian Pakistan firfiakten India rama pawikhawihna an thlen
ṭhin chungchang te, ramri kal≠tlanga India pawisa lem thehdarh a nih dan te, ruihhlo tawlhruk a nih dante a sawichhuah rin a ni.