Lok Sabha panel-in report thehlut

Aam Aadmi Party (AAP) MP Bhagwant Mann-a'n a Facebook-a Parliament building chhung video a dahchhuah chungchang chhuichiangtu, Lok Sabha committee chuan MP thiltih chu Parliament security palzutna lian tak a ni, a ti.

Panel hian Lok Sabha Speaker Sumitra Mahajan hnenah report an thehlut a, mahse report kimchang erawh a la ni lo nia sawi a ni. Panel chairman Kirit Somaiya leh member dangte chuan Mann thiltih dan hi an dem hle a, hremna na tak pawh pek an duh nia sawi a ni a, mahse Lok Sabha aṭanga hnawhchhuah khawp hremna erawh pek an duh lo.

Parliamentary panel hian Mann hi thu an zawtfiah tawh a, a thiltih chu midangte tih tir a ni em tihte an zawt a ni. Mahse Mann chuan tu tirh mah a nih loh thu a sawi. Parliament chhung thla a lak hma hian AAP hotu leh Delhi Chief Minister Arvind Kejriwal-a chuan inter-state council meeting a mobile phone ken phalsak an nih loh avangin a lungawi loh thu a sawichhuak tawh a ni. Hei vang hian an party hotu thusawi avanga hetianga ti hi a ni em tihte pawh an zawt a ni.

Hetihlai hian MP pathumte chuan Thawh≠lehni khan Speaker Mahajan-i hnenah lehkha thawnin, AAP MP Bhagwant Mann hi House-ah rui chunga a kal avangin rehabiliation centre-a thawn turin an ngen. Speaker hnena lehkha thawntute hi BJP MP Mahesh Girri, SAD MP Prem Singh Chandumajra leh AAP MP hrem lai Harinder Singh Khalsa-te an ni.