Bihar board scam : SIT-in Science topper man

Bihar School Examination Board Class-12 exam result tihchingpen chungchang chhuitu, Special Investigation Team chuan nimin khan Science stream-a pathumna, Rahul Kumar an man. Hemi hma hian Board Chairman hlui Lalkeshwar Prasad Signh leh midang eng emaw zat a lo man tawh bawk.

Rahul Kumar hi Vaihsali district-ah man a ni. Art stream-a topper, Ruby Rai-i pawh man a lo ni tawh a, mahse bail-a chhuahtir mek a ni.

Result chhuah hnua TV channel-ten topper-te an kawmna aṭangin thil dik lo a awm tih hriatchhuah a ni a, chhui chian nghal a ni. Rahul leh Ruby bakah Vishu Rai College zirlai ṭhenkhatte chu re-test nei tura koh an ni a, Rahul hi re-test ah hian a fail avangin a result pawh cancel nghal a ni. Ruby Rai erawh chu a dam loh chhuanlamin test neihnaah hian a inlan duh lo a, June 25 khan man a ni. Juvenile home-a dah a nih hnuin tunkar tir lam khan bail-a chhuah phalsak a ni ta a ni.

Police-ten thu an zawhfiahnaah, Rai-i chuan exam pass chu a duhtawk mai a, topper nih duhna a neih loh thu a sawi. Rai-i pa hian a fanu topper-a dah turin education department-a officer eng emaw zat a tham nia puh a ni.

Exam result tihchingpen kaihhnawihah hian mi 20 chuang man an ni tawh.