Delhi sorkar leh sorkar laipui an inep zui zel

Delhi Lieutenant Governor Najeeb Jung-a'n Delhi Chief Secretary a ruat chu Delhi Chief Minister Arvind Kej­riwal-a'n a dodal avanga an inkar boruak chhia chuan ziaawm lam pan loin, sorkar laipui leh Delhi sorkar an la inep zui zel.

Lt Governor Jung hian Delhi Chief Secretary nilai, KK Sharma chu mimal hna avanga US-a a awm vangin additional charge la turin Power Secretary Shakunta Gam­lin chu a ruat a, mahse CM Kejriwal chuan Gamlin-i hi power company-te tlawn chingah puhin a hna thar hi zawm lo turin a hrilh. Mahse Gamlin-i hian CM thurawn hi pawm loin, kar kalta Inrinni khan a hna thar hi a zawm a ni.

Chief Secretary ruat a nih hnua Delhi CM thiltih dan hi sorkar laipui chuan a dem thu sawiin, Union Minister of State for Home Affairs Kiren Rijiju chuan Gamlin hi hmarchhak mi a nih avangin Kejriwal-a thiltih chuan hmarchhak mite rilru pawh a tina hle tiin a sawi. Mahse Delhi CM hian Gamlin-i dik lohna finfiahna hi a nei tih a sawi thung.

Thawhṭanni khan Kejirwal chuan thu­chhuah siamin, sorkar hnathawk liante chu amahin a enfiah hmasa a nih loh chuan Lt Go­ver­­nor Jung thupek chu zawm lo turin a hrilh. Kejriwal chuan Lt Governor office aṭanga Chief Secretary leh admi­nistrative Secretary dang hnena hriattirna leh thupek thawnte chu Minister in-charge leh Chief Minister hnenah thu­tlukna siam tura thawn zel turin a hriattir a ni.

Deputy Chief Minister Manish Sisodia chuan Delhi-in mipuite thlan sorkar a nei a, sorkar hmasate'n a nihna angin an kal tlangpui ngam lo a, anni chu an tlawm ve mai dawn lo tih a sawi.

Delhi sorkar hian a thupek zawm loa Lt Governor-in Delhi CS a ruatna thupek tichhuak­tu, principal secre­tary (services) Anindo Ma­jum­dar chu a hna atangin a sawn tawh bawk.

Additional Solicitor General hlui, Indira Jaising-i pawhin ram danpui hnuaiah Delhi LG chuan chief secretary ruat tura thuneihna a neih loh thu a sawi. Supreme Court lawyer Rajeev Dhavan pawhin Delhi CM ṭan hmun chu a dik zawk tih sawiin, tuna Delhi buaina chu Lt Governor chawh chhuah a ni, a ti. LG chuan chief secretary a ruat thei lo a, a tih theih chu CS hna chelhtuin a thawk thei lo a nih chuan, a aiawhtu tur ruat thuai a ngai tia CM hnena thurawn pek a ni, a ti. Delhi LG chu a thuneihna chin bakah cheah ngaih a ni.

Lt Governor Jung chuan Delhi CM nena sorkar hnathawk posting leh transfer chungchanga an buaina hi nimin khan President Pranab Mukherjee hnenah a thlen. Kejriwal pawhin hemi chungchangah hian nizan khan President a hmu bawk.