Geelani-a'n passport a dil, ngaihdam dil tura phut a ni

Jammu and Kash­mir-a India lak aṭanga inlakhran duhtu pawl, Hurriyat Con­ference chair­man Syed Ali Shah Geelani chuan Saudi Arabia-a a fanu damlo kan a duh avangin Indian passport a dil.

J&K-a ṭangrual sor­kar-a tel, BJP chuan Gee­lani hnenah hian Indian passport a duh a nih chuan India dodal zawnga a lo chet tawh­na­ahte ngaihdam dil phawt turin an phut.

BJP, J&K unit chuan Geelani hian India mi a ni tih hi a pawm phawt a ngai a ni tiin, hei vang hian kum 25 kalta chhunga India dodal zawnga a lo chet tawh dan­ahte ngaihdam a dil a ngai a ni, a ti. "Passport hi India khua leh tui dik tak hnenah chuah pek ṭhin a ni a, India leh democracy dodal hnenah pek a ni ngai lo. Geelani hian passport hi a duh a nih chuan, ram dante hi a zawm ngei tur a ni," a ti.

Geelani passport dil hi BJP-in na takin dodal mah se, ṭangrual sorkar a siampui, Chief Minister Mufti Mohammad Sayeed kaihhruai Peoples Democratic Party chuan a dilna hi an ngaihtuah dawn tih a sawi thung.