Thla 8 hnuah mipui hmaah Jaya-i a inlan dawn

Tamil Nadu Chief Minister hlui leh AIADMK hotu, J Jayalalithaa-i chu nikum September hnua a hmasa ber atan May 22 hian mipui vantlang hmaah a inlan dawn.

A sum lakluh phu loa hausaa puh a, eiruk thubuai siamsakah trial court-in thiam loh chantirin kum li tang tur leh cheng vaibelchhe 100 chawi turin a hrem a, mahse Karnataka High Court-ah a appeal a, High Court chuan an puhnaah hian finfiahna a awm ṭha tawk lo nia sawiin a thubuai hi a titawp sak a ni.

A thubuaia a fihlim hnuah hian mipui hmuhah a la inlan lo a, mahse nimina an party thuchhuah chuan May 22 hian Jay-i hian an party AIADMK dintu, MG Ramachandran, DMK dintu CN Annadurai leh DK dintu Periyar EV Ramasamy-te limah pangpar ṭhi a dah dawn tih a sawi.

May 22 zing dar 7-ah Jaya-i hian party meeting a ko a, hetah hian Tamil Nadu CM-a dah let leh a nih theihna atan legislature party hruaitu atana thlan a nih rin a ni bawk.