BJP-in Patel-i ban dilna pawm

Bharatiya Janata Party (BJP) chuan Gujarat Chief Minister Anandiben Patel-i'n ṭhalai zawkte tan hmun kian tura CM a nihna aṭanga ban a dilna chu a pawm.

Kum 74 mi, Anandiben Patel hian November thlaa kum 75 a tlin hmaa CM aṭanga ban a tum thu leh, amah thlaktu tur ngaihtuah turin party hnenah hian a hrilh a ni.

Patel-i ban dilna hi nimin khan Prime Minister Narendra Modi-a chenna inah BJP parliamentary board meeting chuan a ngaihtuah a, BJP president Amit Shah chuan Patel-i hnen aṭang hian ban a duh thu a hrilhna lehkha a dawng tih party hruaitute hi a hrilh a ni.

Parliamentary board chuan Patel-i ban duhna chu an pawm thu sawiin, hruaitu thar thlang tura legislature party meeting neihpui turin Gujarat-ah observer thawn an remti bawk. Party hruaitu zinga mi, Venkaiah Naidu chuan Gujarat CM thlak tur hian party president Amit Shah dah a ni dawn tia thuthang awm chu thu dik lo a nih thu a sawi a, "Amit Shah hi CM post-ah dah tum a ni lo a, national level-ah party kaihruaitu atan kan mamawh a ni" a ti.

State-in harsatna a tawh chinfel kawngah CM Patel-i hian a hna a tlin tawk lo nia sawiin an party mi leh sate ngei sawisel pawh a tawk fo a, party chhungah CM thlak duh pawl an awm nia sawi a ni. Mahse Patel-i chuan ban tumna chhan chu a kum upat tawh vang niin a sawi thung a, hei bakah hian nakkumah an state chuan assembly inthlan an neih dawn avangin hruaitu thar dah an mamawh tih a sawi.