Delhi khawpui boruak ṭha lo zel

Delhi huam chhunga boruak ṭha tehna chuan hniam lam pan zel in nimin, Ningani zing thleng khan Air Quality Index(AQI) ah 'severe' dinhmunah a awm tawh niin Central Pollution Control Board (CPCB) chuan an tarlang.

IQAir (Swiss air quality technology company) in khawpui 120 data a lakkhawmah, Delhi chu khawvel huapin khawpui boruak bawlhhlawh pahnihna a ni.

CPCB chuan Delhi Air Quality Index (AQI) hian nimin zing dar 9 khan 428 kaiin, hei hi a tehna aṭanga 'severe' a tling. Nilaini khan AQI ah hian kumin chhunga a vawi khatna atan 'severe' hi a kai chho a ni. Vawiin lamah erawh tlema a ziaawm beiseiin, 'very poor' catergory a tlin theih beisei a nih thu an tarlang.

AQI-a 'severe' a awm hian mihring hriselna nasa takin a nghawng theih bakah natna neisate tan a hlauhawm lehzual niin tarlan a ni bawk. Delhi huam chhunga monitoring station 39 awm zingah 32 chuan boruak tehna ah hian 'severe' tling vekin 400 chin chunglam a kai vek niin official te chuan an sawi.

Delhi-a pollution level sang zel mah se, sorkar chuan Graded Response Action Plan (GRAP-III) a hman dawn rih lo tih environment minister Gopal Rai chuan a sawi. Khaw chin zirtituten boruak bawlhlawlh chu ziaawm chho deuh tura an rin avangin, GRAP-II chu man chhunzawm rih a ni anga , khauh taka kenkawh a ni ang, a ti.