Chennai ah doctor beihna thleng leh; Tamil Nadu- ah lungawihlohna lantir

Tamil Nadu khawpui, Chennai-a sorkar enkawl damdawi-in ah Nilaini khan doctor pakhatin beih tawk lehin a beitu hi dam lo an enkawl lai a ni. He thil thleng hi Super Speciality hospital-a doctor pakhat, chem a ṭum sarih zet vih a nih hnu lawka thleng a ni.

Doctor beih tawk hi Dr Hariharan niin sorkar enkawl Stanley Medical College a psychology department-a assistant professor hna chelh lai a ni. Pawikhawihtu hi Neelankarai tih niin thla khat chhung vel damdawi-inah hian an enkawl tawh. Doctor kut a thlak hnuah hian manin thubuai siamsak zui nghal a ni bawk. Doctor Hariharan hi enkawl nghal niin, a dinhmun a hlauhthawnawm loh niin an sawi.

Doctor-ten lungawi lohna lan tir

Doctor pahnihin beih an tawh hnu hian Indian Medical Association(IMA) chuan state chhung hmun eng emaw zat ah lungawi lohna an lantir. Tamil Nadu-a sorkar doctor association chuan Coimbatore-ah pungkhawmin sorkar chu an hna thawhna hmuna venhimna mumal tak pe turin an phut.

Nawrh huaihawt vang hian outpatient enkawlna hmun damdawi-in ṭhenkhatah dar kar eng emaw zat chu service a khaihlak phah a ni. IMA chuan ramchhunga damdawi lama thawktute venhimna chhe lutuk chu an dem thu an tarlang bawk.