Germany in Indian tan visa pek chhuah ti pung dawn

Australia, Canada leh US ten rampawn mi, hnathawka pem lut tih tlemna tur atana ruahmanna an siam mek laiin, Germany chuan ti pung turin ruahmanna a siam ve thung. A chhawrtu tur zingah India pawh a tel.

Germany-a ram dang mi awm tam ber chu India mi niin, a tam zawk hi zirlai leh hnathawk an ni. Thla hmasa aṭang khan Germany hian an rama India mi, hnathawka lut turte tana visa a pek chhuah ṭhin chu 20,000 aṭangin 900,000 ah a ti pung.

Germany Federal Ministry of Labour and Social Affairs chuan heng hna peng hrang hrang - science, engineering leh healthcare lamah te an ramah thawktu an mamawh belh nasat vang niin a tarlang.

India mi, Germany a pem tam zawk hi thiamna lamah degree emaw, a tlukpui emaw nei zel ang an ni a, specialist level-a hnathawk 16% awmin, expert level-ah 37% an awm bawk.

Germany-a India mi, hna nei loa awm hi 2023 khan an ram puma hna nei lo awm zatve chauh an tling. India mi tam zawk chu Germany- ah STEM(science, technology, engineering, and maths) hna an thawk a, hei hi Germany economy in hmasawnna a neih phahna pawimawh tak pakhat nia sawi a ni.

Germany hian IT professional lamah indaih lohna a nei ngah hle a, hei vang hian Indian IT worker pawh an pun phah ngei rin a ni. India mi hnathawk hi Information and Communication-ah 19% vel awmin, scientific leh technical service-ah 18% bawr vel an awm a, manufacturing lamah 14% vel an awm bawk.

Hetih lai hian Australia chuan tualchhung miten hnathawh turah harsatna an tawh lohna turin an rama rei lote hna thawk tura lutte visa a pek ṭhin chu a ti tlem a, zirlai tana visa a pek pawh a ti tlem bawk. Canada pawhin study permit leh work permit a pekchhuah zat a lo ti tlem tawh bawk a ni.