UPA kaihhruaina hnuaiah thlai thar man a sang zawk: Centre

Ramchhung thlai thar tomato, purunsen, alu leh thlai dang mante chu nikum tun ang hun nena khaikhinin a man a to zawk tih sorkar laipui chuan a sawi. Thlai man a to chhan hi kumin chhunga ruahtui tla nasain a nghawng, thlai thar chhuah mumal loh vang nia ngaih a nih thu a tarlang bawk.

Union Consumer Affairs Ministry chuan heng thlai thar, nitina mamawh pathum te hi PM Narendra Modi kaihhruai sorkar kum 10 chhung aiin, Congress kaihhruai Union Progressive Alliance (UPA) sorkar lai khan a man to zawk niin a sawi.

Tomato hi kg khat Rs 52.35 ah a kai chho a, hetih lai hian nikum November 14 khan kg ah Rs 39.2 a ni thung. Alu man pawh hi Ningani khan kg ah Rs 37.48 niin nikum hemi ni angah khan kg ah Rs 24.9 a ni a, a man sanna hi kum khat chhungin 50.52% a tling. Ministry official-te chuan tomato, purunsen leh alu man te hi sik leh sa danglam thutin a thar chhuah lamah nghawng a neih avangin beisei loh lam aṭangin a pun phah ta niin an tarlang.

"Sorkar chuan thlai man sang tur tih ziaawm tumin hmalakna hrang hrang a nei mek a, tomato pawh a man zat bithliahin, purunsen pawh a man sang zel tur venna kawng khat atan sorkarin a dahṭhatte pek chhuah a ni. Hengte vang hian thlai thar pathumte chu man mumal zawka hralh theihin a awm phah a, tomato man pawh 21.4% in a man a hniam theih phah a. Alu leh purunsen man pawh nasa takin a hniam thei a ni" tiin official thuchhuah ah an tarlang bawk.