Delhi Lt Governor-in sorkar hnathawk posting a sût vek

Delhi Chief Secretary ruat chungchanga Lieutenant Governor Najeeb Jung leh Delhi Chief Minister Arvind Kejirwal-te inkara inhriatthiam lohna thleng chuan zual lam a pan zel a, nimin khan Lt Governor hian Delhi sorkarin ni li kalta chhunga sorkar hnathawk posting a siam thar zawng zawnga a sût sak.

Lt Governor Jung hian Delhi Chief Secretary nilai, KK Sharma chu US-a a awm vangin a awm loh chhunga additional charge la turin Power Secretary Shakunta Gamlin chu a ruat a, mahse CM Kejriwal chuan Gamlin-i hi power company-te tlawn chingah puhin a hna thar hi zawm lo turin a hrilh. Mahse Gamlin-i hian CM thurawn hi pawm loin, kar kalta Inrinni khan a hna thar hi a zawm lui ta tho a ni.

Jung leh Kejriwal inkar buaina avang hian Thawhlehni khan President Pranab Mukher­jee pawh an lo hmu ve ve tawh a, hei bakah hian Kejriwal chuan Prime Minister Narendra Modi-a hnenah lehkha thawnin, sorkar laipui chu Delhi sorkar inrelbawlnaa inrawlh a, harsatna siamah a puh bawk. Delhi CM chuan central sorkar chuan Lt Governor kaltlang hian Delhi-a ro rel a tum a ni, a ti. Hei hi President hnenah pawh an hrilh niin Deputy Chief Minister Manish Sisodia chuan a sawi.

Delhi CM Kejriwal chuan Jung chu mipuite an aiawh tura an thlan, a kaihhruaia sorkar inrelbawlnaa inrawlhah a puh bawk.

Sisodia leh Kejriwal hian Thawhlehni zana President an kawmnaah hian, Jung hian an remtih loh thu an sawi chungin Shakuntala Gamlin hi acting chief secretary atan a ruat lui tih an sawi a, mahse a hnuah a ruatna pawh hi an pawmsak zui vel leh tho tih an sawi. Hei hi duhtawk mai loin, Jung hi secretary dang ruatnaah a inrawlh zui ta zel a ni, an ti.

Lt Governor-in secretary (home) post aṭanga a sawn chhuah, Arvind Ray chu AAP sor­kar hian Thawhlehni khan sec­re­tary (general adminstrative depart­ment) ah a dah ve leh a ni. GAD secretary post chelhtu, Anindo Majumdar chu May 15-a Lt Governor-in acting CS atana Gamlin-i a ruatna thupek a tihchhuah avangin Kejriwal-a thu­pek angin Thawhṭanni khan Delhi Secretariat-a a office chu kalh­sak a lo ni tawh bawk.

Jung hian principal secretary (services) atana Rajendra Kumar ruat a nihna chu Thawhṭanni khan a lo hnawlsak a, mahse a thiltih dan chu ram danpui kalh a ni tiin, Lt Governor thupek chu a ngaihpawimawh loh tur thu a sawi thung.

Hetihlai hian dan hremi senior pahnih, Indira Jaising leh Rajeed Dhavan-te chuan Delhi buaina tawh mek chungchangah hian, Lieutenant Governor chu a thiam loh zawkah an puh a, a thuneihna piah lama cheah an puh a ni.