May 23-ah CM atan Jaya-i lalut dawn

Tamil Nadu Chief Minister atan AIADMK hruaitu, J Jayalalithaa-i chu May 23 hian lakluh a ni leh dawn a, hei hi CM atana lakluh a nih ṭum li-na tur a ni.

A sum lakluh phu loa hausaa puhna, eiruk thubuaiah Bengaluru trial court-in thiam loh chantirin kum li tang tur leh cheng vaibelchhe 100 chawi turin a lo hrem tawh a, hei vang hian CM a nihna aṭang bangin politics pawh kum nga chhung khel thei lo tura hrem a ni. Mahse Karnataka High Court-a a appeal hnuah, HC hian an puhnate hi finfiahna ṭha a awm lo tiin a thubuaiah hian a fihlimtir leh ta thung a ni.

Thiam chantir a nih tak avangin CM atan hian lakluh a ni leh thei dawn a, hei bakah hian kumina state assembly inthlan neih turah pawh a chuh thei dawn bawk.

Jaya-i hian May 22 hian AIADMK legislature party meeting a ko a, hemi ni hian hruaitu atan thlan a ni ang. CM nilai, O Pannerslevam chuan Jaya-i CM atana dah leh a nih theihna atan hemi ni vek hian Governor hnenah banna a thehlut dawn bawk a ni.

Jayalalithaa-i hi kum 1991 khan a ṭum khatna atan Tamil Nadu Chief Minister atan lakluh a ni a, kum 2001-06 khan CM ni lehin, kum 2011 khan a ṭum thumna atan lakluh a ni bawk.

Hetihlai hian eptu pawl, DMK chuan Karnataka sorkar hnenah Karnataka High Court-in Jaya-i thubuai a tihfihlimsak chungcahng chu Supreme Court-a appeal turin a ngen. DMK hotu M Karunanidhi chuan legal expert, activist leh journalist hrang hrangte'n High Court-in Jaya-i a ngaihdam chhanah hian thil chhutsual leh dik tawk lo tam tak a awm thu an haichhuak tawh a ni, a ti.