Rajnath-a'n buaina chingfel turin Delhi LG leh CM a ngen

Delhi Acting Chief Secretary atana Shakuntala Gamlin ruat a nih chungchanga Delhi Lieutenant Governor Najeeb Jung leh Delhi Chief Minister Arvind Kejriwal-te inkara buaina punlun chho zel chu chingfel turin Union Home Minister Rajnath Singh chuan a ngen.

Rajnath Singh hian President Pranab Mukherjee a kawm hnua chanchin thar lakhawmtute a kawmnaah, "LG leh CM chu inbiain, an buaina chinfel dan kawng an zawn a ngai a ni. Hei hi an tih theih ngei pawh ka ring tlat a ni," a ti. Hemi rual hian Delhi-a buaina chungchang chu President a sawipui lo niin a sawi thung.

LG Jung-a'n acting Chief Secretary a ruat hi CM chuan a duh lo a, company duhsak bik neia puh a nih avangin a hna pawh hi zawm lo turin a hrilh a ni. Mahse Gamlin-i hian CM in pawm lo turin ngen mah se, a hna thar hi a zawm lui tho a ni.

Kejriwal chuan LG chu a thuneihna chin piah lama cheah puhin, CS thar tur ruatna thupek tichhuaktu Secretary pawh a sawn a, hei bakah sorkar hnathawkte chu LG-in thupek a siam reng reng zawm lo a, a kaihhruai sorkar hnenah thutlukna siam tura thlen zel turin a ti bawk. Hei hi bei letin, LG Jung chuan CM nena inkara inhriatthiam lohna a thlen hnua Delhi-a AAP sorkarin sorkar hnathawk posting a siam thar zawng zawng chu a sut sak ve leh bawk.

Thawhlehni khan LG Jung leh CM Kejriwal-te hian a hran ve vein President Mukherjee hi an lo hmu tawh a, an ṭanhmun a dik zawkzia an sawi a ni.

AAP hruaitu, Ashutosh chuan an buaina neih mek chungchangah Prime Minister Narendra Modi-a kaihhruai sorkar laipui chu inrawlhah a puh a, sorkar laipui chuan LG kaltlangin Delhi-a sorkar hnathawk transfer leh posting-ah thu rawn neih a tum a ni, a ti.

Delhi-a sorkar hnathawkte chuan official-te appointment chungchang politics zawnga kalpui a ni chu an dem thu sawiin, an hna te zalen taka an thawh theihna tura boruak ṭha siam turin an ngen.