Ramdev-a'n Rahul a fak, Modi-a minister sawisel

Yoga guru, BJP sorkar nena inpawh ṭha tak, Ramdev chuan Congress vice president Rahul Gandhi chu fakin, Prime Minister Narendra Modi-a minister-te chu invaivung tiin a sawisel.

Hetihlai hian Ramdev chuan Prime Minister chu mimal taka a fak thu a sawi thung a, mahse a minister-te chu mipuite laka inluling leh invaivung lutukah a puh. Congress hruaitu Rahul Gandhi-a'n sorkar policy sawiselna campaign a neih mek chu fakin, Rahul chuan Congress thi tawh mai tur chu nunna thar a pe leh a ni, a ti.

Ram hmasawnna leh loneitute chunga an chetdanah Congress party chuan sorkar laipui chu a dang chep a ni tiin, "Mipuite leh loneitute rinna nei let leh turin sorkar chuan hma a lak a ngai a, loneitute puala policy thar a siam a ngai dawn a ni," tiin a sawi bawk.

RJD hotu, Lalu Prasad pawhin May 26-a a kum khatna champha thleng tur, PM Modi-a kaih­hruai NDA sorkar chu lo­neitute ṭanpuina kawnga hlawhchhamah a puh. Lalu chuan, "Modi-a sorkar kum khatna hi mark 0 ka pe," tiin, an thlai chin­te ruahsur leh rial tlain a tih­chhiatsak, loneitute puihna kawngah a hlawhchham a, rampawn lam sum chheprelh lakluh a tiam pawh engmah a ti hlawhtling lo a ni, a ti. NDA sorkar chu ṭhalai te tana hna thawh tur pe thei lo leh, hnam leh sakhua tlem zawkte hnenah himna pe thei loah a puh bawk.