Geelani tan passport a dilpui

Jammu and Kash­mir-a BJP-in ṭangrual sorkar a siampui, Peo­ple's Democratic Party (PDP) chuan India laka inlakhran duhtu, Sayed Ali Shah Geelani chu a dil anga Indian passport pe turin a phut.

Geelani hian Saudi Arabia-a a fanu damlo kan a duh avangin Indian passport a dil a, mahse BJP chuan passport chu a duh a nih chuan India dodal zawnga a thusawi leh a thiltih tawhte avangin ngaihdam a dil phawt tur a ni, a ti.

Hetihlai hian J&K-a BJP thawhpui, PDP presi­dent leh MP Meh­booba Mufti-i chuan Gee­lani dilna hi pawmsak turin sorkar a phut a, hemi chung­chang hi Ministry of Home Affairs (MHA) hnenah pawh thlen a tum tih a sawi. Party ṭhenkhat hruaitute pawhin Geelani dilna hi pawmsak mai turin an phut bawk. CPM chuan Geelani zin duh chhan hi ngaihtuahin pek mai ṭha a tih thu a sawi a, hetihlai hian Congress party chuan sorkar chu a duh anga thutlukna siam turin a ti thung.

National Conference chuan Geelani-a passport dil chungchang politics lam zawnga her kual a ṭul lo a tih thu sawiin, Indian passport a duh a nih chuan pek mai ṭha a tih thu a sawi. NC thupuangtu chuan CM hlui leh NC president, Omar Abdullah leh Union Home Minister hlui P Chidambaram-te pawh khan kum 2011-khan Geelani-a passport dilna hi an lo pawmsak tawh a, mahse amah zawk hian a hmang duh lo mai zawk a ni, a ti.