Nestle India hnenah Maggi lakir tura hriattir a ni

Food inspector-te chuan Nestle India hnenah ramchhung hmun hrang hranga zawrh tura Maggi noodles a pekchhuaha lead level chu taksa tana hlauhawm chin nia sawiin lakir leh vek turin a hriattir.

Food Safety and Drug Administration (FDA), Uttar Pradesh chuan Nestle siamchhuah, maggi noodles packet 24 an enfiahnaah lead content hi a sang hle tih an hmuchhuak tih a tarlang.

FDA official pahnihte chuan an state chhunga laboratory-a maggi noodle an enfiah zawng zawngah lead level hi phal chin aia a san vek thu an sawi a, lead level pawm theih chin chu 0.01 parts per million (ppm) - 2.5 ppm a nih laiin, maggi-ah hian 17.2 ppm a tling a ni, an ti.

Scientist-te chuan maggi noodle-ah hian monosodium glutamate (MSG) level pawh a sang hle niin an sawi bawk.

Lucknow-a FDA deputy inspector general, DG Srivastava chuan, "Maggi instant noodle-ah hian lead leh MSG awm hi taksa tana him tawk aiin a sang a, hei vang hian company pawh hriattirna pek a ni," a ti.

Mahse Nestle India chuan Maggi noodle siamna tana raw material hmante himna turin dan khauh tak an nei tih an sawi a, "Maggi Noodle-ah hian MSG hi kan telh lo a, glutamate hi hmuh a lo nih pawhin natural source aṭanga rawn tel a ni ang. Lead content pawh hi uluk taka kan enfiah ṭhin avangin a level zat nia sawi pawh hi mak kan ti hle a ni," a ti.