PM hnenah Nigeria-in 'GCON' a hlan

Nigeria ram chuan prime minister Narendra Modi hnenah Nigeria ram chawimawina sang, Grand Commander of The Order of the Niger (GCON) chu a hlan. Modi hi rampawn mi zingah he award dawng thei pahnihna a ni a, kum 1969 khan England lalnu, Queen Elizabeth hnenah hlan a lo ni tawh bawk.

PM Modi hian Nigeria hi nimin khan a thleng a, ram pathum tlawha a zinchhuahna bul a ṭanna tur a ni. Kum 17 hnuah India Prime Minister zinga Nigeria ram tlawh hmasa ber a ni a, Minister for Federal Capital Territory Nyesom Ezenwo Wike chuan a lo hmuak a ni.

India hian Nigeria ram hmasawnna tur atan a pui nasa hle a, concessional loan leh capacity building training program hmangin hma a sawnna tur kawngah a lo dawm kang tawh a ni. Kum 2007 aṭang khan India leh Nigeria hi economic, energy leh defence lamah an thawk dun a, India company 200 chuangin Nigeria sector pawimawh hrang hrangah USD tld 27 chuang investment an lo ti tawh bawk.

Modi hian Nigeria-a a cham chhung hian ram hruaitu hrang hrangte a kawm dawn a, ram pahnihte inkar tih chakna tur leh tih hmasawnna tur kawng hrang hrang an sawi ho dawn a ni. Nigeria-a hun a hman zawh hian Brazil leh Guyana ram a tlawh leh ang.

"President Bola Ahmed Tinubu sawmna ngai pawimawhin Nigeria hi ka tlawhna hmasa ber tur a ni a, ka cham chhung hian kawng hrang hranga thawh hona tih hmasawn leh tih chakna tur thil te sawi hona hun kan hmang ang. India mi leh sa, Hindi-a min lo lawmtu zawng zawngte pawh hmuhna remchang ka neih ngei ka beisei a ni" tiin Nigeria a pan dawna a thuchhuahah PM Modi chuan a tarlang a ni.