Indian Satellite phur tur Falcon 9 hlawhtlinna 99% tling

Indian Space Research Organisation (ISRO) hmalaknain India chu van boruaka satellite thar kap chhuak leh turin a inbuatsaih mek zel a, kar thar ah hian broadband communications satellite GSAT-20, GSAT N-2 tiha a hming vuah chu khawvel hel turin kah chhuah tum a ni. Falcon 9 rocket hi dollar mtd 70 man nia sawi a ni bawk.

Satellite kah chhuah tur hi US president-elect Donald Trump thawhpui, Elon Musk company SpaceX in a siam niin Falcon-9 a ni. Rocket hi hman nawn theiha duan niin tuna an hman tur hi a thlawh chhuah hmasak ber chu 2018 kha niin vawiin thleng hian ṭum 393 kah chhuah tawh a ni. Ṭum thum chiah la hlawhchhamin a hlawhtlinna neih zat, success rate hi 99% a kai pha.

New Space India Limited Chairman leh Managing Director Radhakrishnan Durairaj chuan, "He ruahmanna ti hlawhtling tur hian SpaceX nen hian in remna ṭha tak kan nei a ni" tiin a sawi. ISRO commercial arm chuan he satellite kahchhuanna tur hi a bultum tu an nih thu leh Falcon 9 chauh hi commercial launcher, India tana hman theih awmchhun a nih thu a sawi bawk.

Falcon 9 rocket hi kumin chhungin ṭum 106 kah chhuah tawh niin company lam chuan ṭum 148 kahchhuah hman an in beisei. Heng mission hrang hrangah hian bungrua leh astronaut-te chu International Space Station(ISS) ah a phur thleng. Crew Dragon Mission, September 28,2024 a zin chhuak Sunita Williams leh Butch Wilmore te chu ISS ah phur thlengin nakkum February 2025 hian khawvel lamah an lo kir leh ang.