Long-range Hypersonic missile enchhin

India chuan missile technology huangah mellung pawimawh tak siam belh lehin, nimin Pathianni khan long-range hypersonic missile chu hlawhtling taka enchhin a ni. India chu hetiang ti thei ram, US, Russia, leh China huangah a tel ve thei ta a ni.

He ralthuam hi Defence Research and Development Organisation(DRDO) kaihhruainain Dr APJ Abdul Kalam Island, Odisha tuipuikam depah enchhinna hi neih a ni. Hypersonic missile hi km 1,500 kap thei tura duan niin Dr APJ Abdul Kalam Missile Complex, Hyderabad-ah siam a ni. A kah thui zawng hi tehkhawng hrang hrang hmanga enchhinna neih a ni bawk.

Defence minister Rajnath Sing chuan ralthuam enchhinna hlawhtling taka neih chu ram tana thil chhinchhiah tlak a nih thu X-ah a sawi a, he thil hian India chu military technology-a a hmasawnna tharah a hlangkai a ni, a ti. DRDO te hna thawh chu chhuanawm a tih thu sawiin, armed force leh industry te inpekna chu fakawm a tih thu a sawi bawk a ni.

DRDO chairman leh DDR&D secretary, Dr Samir V Kamat chuan mission hlawhtlin theihna tura thawktu team-te chu fakawm a tih thu leh, India chu defence technology-a hmasawnna leh khawvel huap pawha sipai chakna nei ṭhaah a hlankai thu a tarlang.