AAP aṭangin Delhi Transport Minister Gahlot a bang

Delhi-a rorellai party, Aam Aadmi Party(AAP) senior leader leh Delhi transport minister ni bawk, Kailaash Gahlot chu nimin khan AAP aṭangin a bang. BJP a zawm dawn nia sawi thawm a awm zui bawk.

Gahlot banna hi Delhi chief minister Atishi chuan a pawmsak nghal a ni. Gahlot hian a banna lehkha hi Delhi CM leh AAP national convenor, Arvind Kejriwal hnenah thawnin, tun hnaia party chhunga thil felhlel awm leh, an thutiam tam tak tih hlawhtlin a nih lohte chu a banna chhana a sawiah hian a tel.

Kejriwal official bungalow thar tur chungchanga an buaina pawh ziak telin, hetiang thil buaipui chu thil zahthlak leh mawi lo tak nia a ngaih thu te, mipui te dikna tur a bei loa, an party thil ringawt an buaipuina chuan Delhi mipui tana mamawh dik tak zawk buapui hman loa a siam thu te a ziak bawk. Sorkar laipui nena an inep reng bawk avangin Delhi tan hmasawnna tak tak thlen a har tiin a sawi a, hei vang hian party aṭanga inlakhran mai loh chu thlan tur dang a nei lo niin a sawi.

AAP Sanjay Singh chuan he thilah hian BJP an inrawlh ngei a rin thu a sawi a, Gahlot-a'n a banna lehkha a ziahah pawh BJP in sawi tura an tih ang chin chiah a ziak nia a lan thu a sawi a ni.