Kailash Gahlot chuan a duh lam lam a pan thei: Arvind Kejriwal

Delhi minister hlui, Kailash Gahlot chuan Aam Aadmi Party (AAP) aṭanga banna a thehluh hnuah BJP a zawm tih a chiang ta. Hemi chungchangah hian AAP national convenor Arvind Kejriwal chu ṭawng chhuakin, Gahlot chuan zalenna a neih thu a sawi.

AAP leader hlui Kailash Gahlot-a'n BJP a zawm chungchang zawhna chu Kejirwal chuan "Zalenna a neih angin a duhna hmun hmun pan thei a ni, " tiin a chhang.

Kailash Gahlot hian Pathianni khan minister anihna leh, AAP member a nihna aṭanga a ban thu hi CM Atishi leh Kejriwal hnenah hian thawnin CM Atishi hian a pawmsak nghal bawk. Gahlot an BJP a zawm chungchangah hian Delhi deputy chief minister hlui, Manish Sisodia ṭawng chhuakin,"Kailash hian hun rei tak chhung kan zingah tel tawhin ama duhdan chauh a dah pawimawh a ni"a ti.

AAP senior leader Durgesh Pathak chuan Kailash Gahlot hi central hnuchhuitu pawl hrang hrang, Enforcement Department leh Income Tax Department te chuan thla eng emaw zat liam ta aṭang khan zawhna eng eng emaw zawtin an bitum a, hei hi tuar zo loin party hi a chhuahsan ta ni, a ti ve bawk.