Sorkar siam turin Jaya-i sawm Vawiinah Jayaa-i CM atan lakluh beisei a ni

Tamil Nadu Chief Minister O Panneer­selvam-a'n CM aṭanga banna a thehluh avangin Governor K Rosaiah chuan nimin khan AIADMK hotu lu ber, J Jayalalithaa-i chu sorkar siam turin a sawm. Vawiinah CM thar atan Jaya-i hi lakluh beisei a ni.

AIADMK hotu, Jaya-i hi eiruk thubuaiah thiam loh chantir a, jail tang tura hrem a nih avangin Tamil Nadu Chief Minister a nihna aṭangin bantir a ni a, a aiah an party hruaitu O Pannerselvam hi dah a ni. Mahse a thubuaiah hian Karnataka High Court-in thiam a chantir leh tak avangin CM dinhmun a luah leh theihna atan Ningani khan Panneersevlam hi a nihna aṭanga banna a thehlut ve leh a ni.

Governor Rosaiah chuan CM Panner­selvam banna hi pawmin, Jaya-i hi sorkar thar siam turin a sawm ta nghal a ni.

Nimin khan AIADMK chuan legislature party meeting neiin, Jaya-i hi a CM leh theihna atan legislature party hruaitu atan an thlang bawk.

A thubuai aṭanga a fihlim hnua thuchhuah a siamah, Jayalaithaa-i chuan an party mite duhdan chu a hun dik takah a thleng a ni tiin, engmahin an dang zo lo a ti. "Mi hneh a, min tihchhiat tumte chu an hlawhtling ngai lo ang. Dik lo takin thu an vawrh darh ṭhin a, mahse heng thuthang dik lote hi ngaihven loin, kan party chuan ruahmanna fel tak hnuaia kan thil tumte tipuitling turin hmalam kan pan zel dawn a ni," a ti.