MEA-in Geelani passport dilna a hnawl

Jammu and Kashmir-a inlakhran duhtu pawl, Hurriyat hruaitu Syed Ali Shah Geelani-a'n Saudi Arabia-a fanu damlo kan tura a zin theihna atan passport a dil chu Mi­nis­try of External Affairs (MEA) chuan a hnawl­sak.

MEA thupuangtu, Vikas Swarup chuan Gee­lani hian passport a dil­na form a thehluh hi a tikim lo a, fee pek a nih loh bakah, biometric detail leh thlalak pawh thehluh tel a ni lo tiin, hetianga dilna kim lo chu an pawm theih loh thu a sawi.

Ministry official chuan Geelani hian appli­cation form hi dik taka dah khatin, India khua leh a tui a nih tih hi puang ngam se, a passport dilna hi hnawlna chhan tur engmah a awm lo a ni, a ti. Union Minister Kiren Rijiju pawhin India mi tupawhin passport chu an dil thei a ni tiin, document-te a dik a nih chuan Geelani dilna pawh hi pawmsak a nih tur thu a sawi tawh bawk.

Geelani hian a dilna form-a eng ram mi nge a nih tih ziahlanna turah engmah ziak loin a dah awl a, mahse an chenna bial chu ram inchuh lai mek a nih avangin a ziak lang lo tiin a sawi thung.

Hetihlai hian official-te chuan Geelani hi kum 2007 leh 2009 khan In­dian passport pek a lo ni tawh tih sawiin, hengahte hian nationality column hi a dahkhah loh chuan pawm a ni lo ang, tiin Hur­riyat hruaitu hian a hmaa passport a dil ṭum khan Indian tiin a lo ziak tawh a ni, an ti.