Modi-a'n Delhi sorkar thuneihna awpbeh a tum: Kejriwal

Delhi Chief Minister Arvind Kej­riwal chuan sorkar hnathawk pos­ting leh transfer chungchanga Lieutenant Governor Najeeb Jung nena an buaina neih mekah, central-a BJP kaihhruai NDA sorkar chu LG kaltlanga Delhi sorkar inrelbawlnaa inrawlh tumah a puh.

Kejriwal chuan, a thuruk ṭawm­puitute leh a ṭhianṭhate humna atan Prime Minister Narendra Modi chuan Delhi sorkar thuneihna awpbeh sak a tum a ni, a ti.

Delhi CM Kejriwal chuan a kaih­hruai, AAP sorkarin eirukna tibo turin theihtawp a chhuah a, hei hi central-a BJP sorkar chuan a hlau a ni, tiin a sawi. Transfer hmanga sum tam tak hmuh an tumna hmanrua chu an kharsak tih sawiin, LG chu PM Office-in milem ang maia a duh duha a kawihher theih a ni, a ti.

CM chuan an buaina hmachhawn mek chu LG Jung nena inbeihna ni loin, eiruk nuaibo tuma an beihna a ni tih a sawi. "LG huatna hi ka nei lo a, amah pawh hi ka bei lo a ni. LG hi an hmatheh mai a ni a, phone pawh PMO aṭanga chhuak vek a ni a, LG hian thutlukna siam tawh chu a zawm zawk mai a ni," a ti.

Home Ministry chuan Delhi sorkar hnenah hian hriattirna pein, LG chuan sorkar hnathawk officer posting leh transfer naah thu a nei a, Delhi sorkar a rawn kher a ngai lo tih a hrilh. Hei hi chhang letin, Delhi CM chuan Home Ministry hriattirna tihchhuah chu ram danpui nena inmil lo a ni tih sawiin, mipuite duhthlanna hmusitna a ni, a ti. Home Ministry thuchhuah chu PM Modi leh a cabinet-te dictator zia lantirna a ni a, ram danpui leh democracy kalh a ni tiin Delhi CM chuan a sawi.