Bawngsa tel loa awm thei lo chu Pakistan-ah kal rawh se: Minister

Union Minister for Minority Affairs Mukhtar Abbas Naqvi chuan bawngsa tel loa awm thei lo tura inngai chu Pakistan-ah kal mai tur tiin Ningani khan a sawi.

Ningania India Today Group consulting editor Rajdeep Sarde­sai-a'n a kawm ṭumin sorkar lai­puiin hnam leh sakhaw tlem zawkte hamṭhatna turin eng angin nge a thawh tih a zawt a, hei hi chhangin minister chuan, "Pawl ṭhenkhatin bawngsa an ei loh leh, an hralh chhuah theih loh vanga an thi mai dawn nia an inngai a nih chuan hei hi an awmna ram tur a ni lo tihna a ni mai. An duh leh Pakistan-ah emaw, Arab ramahte kal mai rawh se," tiin a sawi.

Ramchhunga bawngsa ei nasa leh zawrh nasatna, hmarchhak state, Goa leh Kerala-a chengte India ram chhuahsan turin a duh tihna em ni tih chu chhangin, "Bawngsa tel loa in awm thei lo a nih chuan, a chhan chu he ramah hian bawngsa hi ei phal a ni dawn lo," a ti.

Panel-ah hian AIMIM hruai­tu Asaduddin Owaisi pawh a tel a, ani hian Goa Chief Minister Laxmikant Parsekar-a'n Goa mipuite hnenah eng pawh thleng se an state-ah bawngsa khap a ni dawn lo tia a lo tiam tawh avangin, CM pawh hi India ram chhuahsan turin a ti mai dawm em ni tiin a zawt let bawk.

Parsekar hian Maharashtra sorkarin an state chhunga bawngsa ei leh zawrh khapna dan a siam khan, "CM ka nih angin kan state mipuite hi ka ngaihven vek an ngai a ni. Goa-ah hian Kristian 30% an awm a, a bak chu Muslim an ni. Anni chuan bawngsa hi nitinin an ei ṭhin a, eng vangin nge ka lo khapsak ngawt ang? Goa CM ka nih angin Goa-ah chuan bawngsa hi kan khap ve dawn lo," tiin a lo sawi tawh a ni.

Mahse Union Home Minister Rajnath Singh chuan sorkar laipuiin rampumah bawng talh leh a sa ei khap a nih theihna tura a beih tur chu March thla khan a lo sawi tawh bawk. "Kan theih tawpin he khapna dan hi siam ngei kan tum dawn a ni," a ti.

Thla hmasaa BJP President Amit Shah-a'n Meghalaya state a tlawh ṭum khan, BJP-in rampuma bawngsa khap tuma a hmalakna dodalna lantir nan Shillong-a BJP office bulah beef party an lo huaihawt a ni. Hemi hnu hian BJP hruaitu, Ram Madhav chuan hmarchhak bialah chuan bawngsa hi khap an tum loh thu a sawi.