COP29-a EU rawtna India in pawm ve lo

Azerbaijan rama 29th Conference of the Parties (COP29) hman meka European Union-in Carbon Border Adjustment Mechanism (CBAM) ruahmanna a siam chu India chuan a pawm ve theih loh thu Thawhṭanni khan tarlang. COP29 hi a kar hnihna a ni tawh.

COP29 ah hian khawvel huapa sik leh sa inthlak danglam tih ziawmna tur atan hmalakna turte duan niin, CBAM-ah hian carbon intensive goods hrang hrang - iron leh steel, aluminium, leh cement-te ramri pela thawnchhuahnaah chhiah a tih pun rawt a ni. Hei hi India chuan duh loin, ram rethei zawk ten an tawrh phah dawn avangin ram changkang, developed ram chauhah hman ni se a ti a ni. Ram ṭhanglai, India leh China tiamin, sumdawnnaah nasa taka a nghawng theih dawn vangin India chuan a dodal a ni.

India environment secretary Leena Nandan chuan,"He ruahmanna siam hi ram ṭhanglaite tana a ṭhalo zawnga nghawng nei tur leh rualkhai lo, sik leh sa nghawng thei sumdawnna kalpui tum chu ngaihtuah nawn a ṭul a ni" tiin a sawi. India in khawvel huap sik leh sa inthlak hmachhawn dan tur a tarlan pa li zingah hian 'daidanna leh khuahkhirhna awmlo' technology transfer te, international cooperation tih changtlun te, in rintawnna siam leh sik leh sa nghawng thei laka hma lak dan tur duante a tel.

COP29 hman mekah hian Thawhṭanni vek khan Delhi boruak dinhmun chhe chak lutuk chungchang chu ngaihtuah a ni bawk. Global Health community chuan India chu hma lam hunah fossil fuel hmang ṭhin thilte ti tlem a, climate policy mumal zawk duang tur leh, hman nawn theih chi energy te hmang tam a public transport-te khawpuiah ti changtlung turin thurawn a pe a ni.