Rajasthan-ah boruak bawlhhlawh tih ziawm nan mines 3,000 khar

Tun hnaiah boruak bawlhhlawh a zual zel avangin Rajasthan-a chief minister Bajan Lal kaihhruai sorkar chuan an state-a Alwar leh Bharatpur district huama thil laihchhuahna hmun leh industry 3,000 chuang a khar tir.

Rajasthan sorkar hian Rajasthan Pollution Control Board thurawn anga heng hmunte hi a khar a ni.

Henglai huam chhunga construction hna hrang hrang thawh te pawh chu boruak bawlhhlawh zual zel avang hian chhunzawm rih lo tura tih an ni bawk. He thutlukna hi India khawpui, Delhi-a boruak bawlhlawh avanga kaihhruaina hrang hrang an tih chhuah hnu lawka an tih chhuak ve a ni.

Alwar district huam chhungah hian Air Quality Index (AQI) chu Thawhṭanni khan 295 ah a kai a, Bhiwadi-ah chuan AQI hi 442 kaiin 'severe plus' a ni pha a ni. AQI a san chhoh tak zel vangin state chuan boruak bawlhhlawh ti ziaawm tura hmalakna tur level sang ber, Graded Response Action Plan (GRAP 4) chu a hmang ta a ni. GRAP 4 hi Alwar leh Bharatpur district-ah hman niin, heng hmun hi National Capital Region (NCP) huam chhungah an awm.

Rajasthan-a district eng emaw zatah AQI level hi 'poor' leh 'severe' te an ni hlawm bawk.

Hetianga boruak a rawn bawlhhlawh zual chhan lian tak chu Punjab leh Haryana-a thlai ro hal nasat vang a ni a, a bikin Jhunjhunu, Bikaner, Churu, leh Hanumangarh district-te a nghawng na zual a ni.

Chhunah pawh khaw hmuh hlat theih loh khawpin boruak a zing a, mi tam takin mit lamah harsatna neiin, thawk harsa, khuh leh hnaptui rengte an neih phah bawk.