Amit Shah-a'n CAA dodaltute a ngaipawimawh lo

Union home minister Amit Shah chuan nimin khan Lucknow-a rally-ah thu sawiin sorkar chuan CAA chu an sut dawn lo tih a sawi.

"Heihi ka sawi nawn leh dun a ni, sorkar chuan CAA a sut dawn lo. A dodal duh chuan an duh chuan chhunzawm rawh se," tiin a sawi. CAA chuan ramchhung khua leh tuite lakah engmah a thlen dawn lo tih sawiin eptute'n dawt an ṭhehdarh vanga dodalna chhuak a nih thu a sawi. CAA provision-ah hian khua leh tui laksakna chungchang engmah a inziak lo. Congress, SP, BSP leh TMC-te chuan thu dik lo an thehdarh mai a ni, a ti.

Amit Shah chuan India inṭhendarh hunlai khan Bangladesh mipui 30% chu Hindu, Sikh Buddhist leh Jain-te an ni a, Pakistan-ah chuan 23%. Tunah chuan 7% leh 3% chiah anni tawh. Heng mite hi khawiah nge an kal? CAA dodaltute kha heihi ka zawt duh a ni, tiin dodaltute chu a na takin a dem thu a sawi.

January 5-a JNU campus-a buaina chhuak chungchang pawh sawichhuakin Home Minister chuan  India ram hmun 1000-a ṭhendarh duhtute chu Jail-ah dah anni ang, a ti. JNU-ah chuan India inpumkhatna duh lohna thu nasa taka aupui a nih thu sawiin, India ṭhendarhna chungchang in aupui leh a nih chuan tan-inah dah inni ang, tiin vauna thu a auchhuahpui zui. Shah hian  Rahul, Akhilesh, Mamata leh Mayawati-te chu CAA chungchang mipui hmaa sawipuiah a cho nghal bawk a, Ayodhya-a Ram temple chu thla thum chhunga sak a nih dawn thu a sawi bawk a ni.