TN CM-in welfare scheme 5 a puang

Tamil Nadu Chief Minister atana lakluh thar, J Jayalalithaa-i chuan CM atana lakluh a nih tuk, Pathianni khan a hna thawk ṭanin cheng vaibelchhe 1,800 hu welfare scheme panga a puang nghal.

Eirua puhna thubuaia thiam loh chantir a nih avangin thla riat chhung thuneihna chelh loin AIADMK hotu, Jaya-i hi a awm, mahse Karnataka High Court-in a thubuaiah fihlima a puan leh tak avangin Inrinni khan a ṭum nga-na atan Tamil Nadu Chief Minister-ah lakluh leh a ni.

Pathiannia CM tharin scheme thar a puan zingah hian mi retheite tana in sakna tur, housing project pawh a tel. Hei bakah hian Tamil Nadu state chhung hmun hrang hranga Amma canteen 201 hawnna tur te, hmeithai chhungkaw tana hna siamsakna tur leh, kawngpui chei ṭhatna tur project te a tel. Hemi ni vek hian CM hian polic headquarters thar a hawng bawk.

Hetihlai hian Tamil Nadu-a eptu pawl, DMK chuan Karnataka High Court-in Jaya-i thubuai a hlihsak hi Supreme Court-ah appeal an tum tih a sawi. DMK district sec­retary meeting-ah thutlukna hi an siam a ni. DMK hotu Karunanidhi chuan spe­cial public prosecutor BV Acharya leh Kar­nataka advocate general Ravivarma Kumar-te chuan Karnataka sorkar hnenah pawh High Court thutlukna hi appeal tura an rawt thu a sawi.