Maoist-te'n Bihar-ah truck 35 an hal

Maoist helho chuan an pawl member pakhat kahhlum a nih avanga lungawi lohna lantirin, nimin khan Bihar, Gaya district-a, National High­way 2 ah nimin khan truck 35 an hal.

Hel 200 vel hian New Delhi leh Kolkalta inkal­pawhna NH 2 hi Patna aṭanga chhimthlang lam kilometre 130 vela hla, Gaya district-ah chhun dar 12.30 vel khan dang­in, motor lian te chu an dintir a, an tank aṭanga diesel lachhuakin an mo­tor halsakna atan hian an hmang zui nghal a ni.

Mita hmutute chuan helho hian truck khalhtu leh driver dangte chu an motor kalsan a, insa­seng turin an hriattir a, tualchhung mite pawh an vau bawk.

DIG Magadh Range Shalin chuan helhoin motor an hal thu an dawn veleh hian police official-te chu a hmunah hian tirh nghal an ni tih a sawi. Gaya SSP Manu Maharaj, ASP (operation) leh DSP (Shergati) te kaihhruai team chu thleng nghal mah se, motor kang hi a tam avangin an ṭhelh mai thei lo a ni.

Maoist-te hian May 17-a security force te'n an pawl woman com­man­der an kahhlum avangin ni hnih chhung lung­awi lohna lantir an tum thu an sawi. Nimina kawng­pui an dan vang hian sumdawng leh private motor tam tak kawng­puiah hian an tang a ni.