Union minister-te zinna senso puanzar phut

Central Information Commission panel chuan union minister-te'n ramchhung leh rampawn an tlawh kualna an sum senso zat chu puanzar a phut.

Chief Information Commissioner hlui AN Tiwari leh Information Commissioner MM Ansari-te awmna committee chuan "Transparency Audit: Towards An Open and Accountable Government" tih hmangin report a pe a, hetah hian kum 2012, September 11 khan ministry hrang hrangte hnenah an minister-te ramchhung leh rampawna an zinna sensote hriattir zel turin hrilh an nih thu a sawi. Minister-te zinna senso hi thla li dan zelah tih thar zel tura hrilh an ni bawk.

Ministry hrang hrang bakah, sorkar laipui hnenah pawh minister-te hmun tlawh te, an mi hmuhte, hun an hman chen te, official an hruai zat leh an hmingte pawh puanzar turin a ngen tel bawk a ni. Committee chuan democracy sorkarin a tum chu mipuite thuam chak a, an hnenah service rintlak leh ṭha pek a ni, a ti. Hei vang hian mipui rawngbawltu minister-te chuan an rawngbawlsak mipuite lakah thuruk an nei tur a ni lo tiin a sawi.

Chief Information Commissioner Satyananda Mishra chuan minister leh VVIP-te zinkualna atana sum senso hi mipuite'n an ngaihven hle tiin, RTI hmanga dilna te pawh a lut tih a sawi.

CIC ngenna ang hian Prime Minister hlui Manmohan Singh khan official website-ah amah leh a minister-te zinna senso chu a tarlang ṭhin a ni. Kum 2004-2013 chhung khan Manmohan Singh hian rampawn lama a zinna atan cheng vaibelchhe 642 a hman thu PMO chuan a tarlang.