Poland President thlanah eptu pawl an chak

Poland President thlan­­na, Pathiannia neih takah eptu pawl Law and Justice party candi­date, Andrzej Duda chuan Pre­sident ṭanglai, Bro­ni­slaw Komorowski a hneh.

Inthlan result kim­chang hi puan la ni lo mah se, President Komo­rowski hian a chak loh hi a pawm thu a sawi tawh a, Duda hi lawmpuina hlanin President ṭha tak ni turin duhsakna a hlan tawh a ni.

Poland President thlanna thawh khatna neihah candidate zing­ah tling tura vote hmuh ngai zat, vote tla aṭanga 50% hmu pha an awm loh avangin a vote hmu sang pahnih, Duda leh Komorowski-te hian Pathianni khan inthlan thawh hnihna hi an hmachhawn leh a ni. Duda hian vote tla aṭangin 53% hmuin, President Komorowski hian 47% a hmu.

Kum 43 mi, Duda chuan amah thlawptute chungchangah lawmthu sawiin, "Poland ram hi a ṭha zawngin kan thlak danglam dawn a ni," a ti. Hemi rual hian an ramin harsatna a tawh mek chingfel tur chuan hna hautak tak an thawh an ngai dawn tih a sawi.