NDA kum 1 tlin pualin PM Modi-an mipuite lehkha thawn

Central-a BJP kaihhruai National Democratic Alliance (NDA) sorkar chuan nimin khan a kum khatna a hmang tling a, kum khat a tlin pual hian Prime Minister Narendra Modi chuan ram mipuite hnena a lehkha thawn a tichhuak.

PM Modi chuan a kaihhruai sorkarin ram sum leh pai dinhmun siamṭhaa, eirukna laka fihlim rorelna leh rintlak sorkar siam a tum a ni, a ti.

"Sorkarna kan lak ṭum khan India ramah chuan inrintawkna a tlahniam a, thunun loh eirukna leh thutlukna mumal siam theih lohnate chuan sorkar hna thawh tur pawh a uaibet a ni. Mipuite chu thil man sang chak lutuk leh, sum lama innghah ngamna ṭha nei loin rilru hah takin an awm a, hei vang hian rang tak leh hmanhmawh taka hmalak nghal a ngai a ni," tiin PM chuan bul a ṭan.

Modi chuan, "Thil man sang lutukte chu thunun a ni a, sum leh pai dinhmun pawh siamṭharin, policy nei sorkar nghet chu din a ni," a ti.

NDA sorkar kum khatna champha pual hian Thawhṭanni khan Mathura-ah rally a huai­hawt bawk a, hei bakah hian BJP chuan ramchhung khawpui lian hrang hrangah rally 200 huaihawt a tum.

PM chuan a kaih­hruai sorkarin mi retheite chawikanna turin theih­tawpin kum khat kalta chhung khan a thawk tawh a ni tiin, sorkar chu mi retheite leh hnuai­hnung zawkte tana ding a ni tih a sawi. "Tun hi bul kan ṭanna chauh a ni a, kan tum chu mipui­te tana infrastructure, service tha leh khawsak nawmna pek a ni," tiin Modi chuan a sawi.

NDA sorkar kum khatna puala chanchinbu hrang hrangte'n zirchianna an neihah, NDA sorkarin a kum khatna chhunga a hnathawh chu a ṭha thawkhat niin mi tam zawkin an ngai a, hetihlai hian hna thawh tur la vang te, thil man la to chho zel leh Land Acquisition Bill-te chu thil ngaihtuah ngai tak niin an ngai bawk.

IBN-in state 23-a survey a neihah zawhna chhangtu zinga 60% chuan kum khat kalta aṭang khan an sum dinhmun pawhin hma a sawn nia an ngaih thu an sawi a, hetihlai hian 55% chuan eirukna thleng chu a la ngai reng niin an sawi bawk. Modi-a'n Make in India policy a siam chu mi tam zawkin la ring ngam lo mah se, ram tihthianghlimna tura beihpui thlak nan, Swachch Bharat campaign a tlangzarh erawh chu 85% in an thlawp.

Times of India survey buatsaihah pawh chhangtu zinga 77.5% chuan NDA sorkar kum khatna chu hna thawk ṭhaa an ngaih thu an sawi.